ich (dä tommy) bin eigentli scho länger uf dä suech gsi nacheme geignete alass, woni dä niggi än nöd ganz alltägliche hüüratsatrag z mache. lang isch mer nüüt gschiits in sinn cho und am kai pflaume alüüte wär ja scho es bitz zu eifach. so hani dänn im januar eifach mal ufem standesamt aglüttet und dä termin am nomitag vom mittwuch, 12.5.04 für üs reserviärt. dä termin isch drum speziell, well mir üs am 12.5.99 (läck, das isch ja im letschte jahrtuusig gsi) käneglernt händ. dänn, churz drufabe, hät sich äs töörli zumene spezielle hüratsatrag plötzli uftue und ich han d chance ergriffä...

d niggi hät ja bekanntlich am 29.2. geburi. us dem grund isch si vo dä nicole vandenbrouck vo dä oberseenachrichte gfröget worde, öb si würd äs interview zu däm doch spezielle geburi datum z’gäh. nach afänglichem zögere hät sie dänn doch zuegseit.



für mich dä momänt, zum ebefalls mit dä nicole vandenbrouck z’telifoniäre, natürli ohni, dass d niggi öppis devo gwüsst hät. schnell hani d journalischtin vo dä oberseenachrichte über min plan i känntnis gsetzt und si pätte, doch öppis über üse grossi tag am 12.5.04 is interview mit dä niggi z schmuggle, natürli ohni dass d niggi öppis devo merkt. d nicole vandenbrouck und d oberseenachrichte händ dä gspass under dä voruusetzig mitgamcht, dass sie dörf go föttele cho im mai. natürli hani gern zuegseit und ab dänn hät alles sin lauf gno.

d nicole vandenbrouck isch dänn au tatsächlich zu dem interview uftaucht und hät dä niggi frage zu diesem und jenem gstellt. s interview isch grad in vollem gange gsi, wo ich zuefällig heicho bin. schiiheilig hät d nicole vandenbrouck näbscht dä föteli vo dä niggi eilei no es paar fötteli mit dä niggi und mir zäme gmacht. d begründig für diä föteli isch zwar fadeschiinig gsi, d niggi hät aber nüüt gmerkt und so hät d redaktorin vo dä oberseenachrichte alles zäme gha, wo si pruucht hät für dä pricht und dä konsperativ planti zuesatz.





d oberssenachricht chömet bi euis i dä region immer am dunschtig use und erreichet öppe 70’000 läser. entsprächend hät mer fascht dä arsch gschnuret vor vorfreuid uf dä gsicht, wo d niggi am dunschtig morge macht, wänn sie dä ziitigspricht mit äm spezielle zuesatz gseht. weli aber us terminliche gründ am dunschtig nöd ume gsi wär am abig, hani dänn am mittwuch, also am abig bevor d oberseenachrichte usechömet, min aatrag im rahme vome eifache aber feine znacht höch über äm zürisee i form vomene struus mit 12 bunte und 5 rote rose und äme chärtli wo eifach drin gstande isch ‘säg ja’ gmacht. d niggi isch zimmli paff gsi, zumal dä struus scho ufem tisch gstande isch womer cho sind, s JA isch aber luut und tütlich gsi und so hani dänn i rue no chöne d bombe platze lah vowäge ziitigspricht... das gsicht het mer söle fötele :-)...


än härzliche dank at nicole vandenbrouck und as team vo dä oberseenachrichte, d überraschig isch glunge und d niggi und ich werdet dä tag sicher nöd so schnell vergässe!

tommy

ps: für ali diä, wo dä pricht über min schatz i dä on verpasst händ, voila!